آفریدی، علی ظفر کی بدولت کک باکسر آغا کلیم کی ٹریننگ کا دوبارہ آغاز

پاکستان کے معروف گلوکار علی ظفر، قومی ٹیم کے سابق کپتان اور ڈائریکٹر سپورٹس سماء شاہد آفریدی کی کاوشوں کی بدولت معروف کک باکسر آغا کلیم نے دوبارہ ٹریننگ کا آغاز کر دیا۔
خیال رہے کہ لاہور سے تعلق رکھنے والے کلیم نے کک باکسنگ میں متعدد قومی اور بین الاقوامی ٹائٹل جیت چکے ہیں۔
سماجی رابطے کی ویب سائٹ ٹویٹر پر شئیر ویڈیو میں آغا کلیم سڑک کے کنارے ریسٹورنٹ میں روٹیاں بنا رہے ہیں۔
ویڈیو کے ساتھ کک باکسر نے مدد کی اپیل کی تھی۔
یہ ویڈیو سامنے آنے کے بعد ڈائریکٹر سپورٹس سماء ٹی وی شاہد آفریدی ٹویٹ کو ری ٹویٹ کرتے ہوئے لکھا کہ ہم یہ ذمہ داری اٹھانے کے لیے پوری طرح تیار ہیں اور انشاء اللہ آپ کے کیریئر کو آگے بڑھانے کے لیے آپ کی مدد کریں گے۔
سابق کپتان نے آغا کلیم کو مشورہ دیتے ہوئے کہا کہ شاہد آفریدی فاؤنڈیشن، میگا سٹار لیگ تک رسائی حاصل کرو جو اسی مقصد کے لیے بنائی گئی ہے۔ یہ دونوں فاؤنڈیشن اسی مقصد کے لیے بنائی گئی ہیں۔ دونوں کو آپ کے بارے میں آگاہ کر دیا گیا ہے۔
دوسری طرف گلوکار علی ظفر نے بھی باکسر آغا کلیم کی مدد کا اعلان کر کے دل جیت لیے۔
علی ظفر نے ٹویٹر پر جواب دیتے ہوئے کہا کہ ہمیں اپنے قومی ہیروز کی قدر کرنی چاہیے۔ خاص طور پر ان لوگوں کی جنہوں نے ہمیں بین الاقوامی سطح پر فخر دلایا ہے۔
اپنی بات کو جاری رکھتے ہوئے انہوں نے کہا کہ ایسے ٹیلنٹ کو روکنے والے اسپورٹس مافیاز کو ختم کیا جانا چاہیے، میں آغا کلیم کی مالی مدد کروں گا۔
علی ظفر نے کلیم کو رنگ میں واپس آنے اور دوبارہ لڑنے کی ترغیب دی۔ جبکہ اپنی اگلی فلم کے لیے کلیم آغا کے ساتھ ٹریننگ کی بھی پیشکش کی۔
دوبارہ پریکٹس شروع کرنے کے بعد کک باکسر آغا کلیم نے سماجی رابطے کی ویب سائٹ ٹویٹر پر ایک ویڈیو شیئر کرتے ہوئے لکھا کہ ٹریننگ کا آغاز ہو گیا ہے، میں شاہد آفریدی اور علی ظفر کا مشکور ہوں جنہوں نے میری مدد کی۔ اگلی منزل دبئی میں ہونے والا ایونٹ ہے۔
اس ٹویٹ کو ری ٹویٹ کرتے ہوئے گلوکار علی ظفر نے لکھا کہ بہت زبردست، انشاء اللہ آپ جیت جائیں گے۔