بھارت کیخلاف امریکی سینیٹ میں قرارداد پیش

بھارت میں مذہبی اور سیاسی جبر کے خلاف امریکی سینٹ میں قرارداد پیش کر دی گئی۔
غیر ملکی خبر رساں ایجنسی کے مطابق بھارت کے خلاف امریکی سینٹ میں قرارداد سینیٹر ٹیمی بالڈون نے پیش کی۔ قرارداد کے متن میں کہا گیا کہ بھارت میں مذہب کی بنیاد پر امتیازی پالیسیوں کا معاملہ اٹھایا جائے۔
متن کے مطابق بھارت میں پرامن مظاہرین پر تشدد کے خاتمے کے لیے بھارتی حکومت سے بات کی جائے کیونکہ مذہبی آزادی بنیادی حق ہے اور خلا ف ورزی پر امریکہ کو کھڑا ہونا اور بولنا چاہیے۔
قرارداد میں کہا گیا کہ منظم مذہبی اور سیاسی ظلم وستم روکنے کے لیے بھارت پر دباؤ ڈالا جائے۔ بھارت شہریوں کو خطرے میں ڈال رہا ہے اور حق رائے دہی سے محروم کر رہا ہے۔
مطالبہ کیا گیا کہ بھارت میں مسلمانوں اور مسیحیوں کے خلاف امتیازی پالیسیاں تبدیل کرنے کے لیے کام کیا جائے۔