معاشی نقصانات روکنے کیلئے غیر قانونی سرگرمیوں کیخلاف کارروائیاں جاری رہیں گی، آرمی چیف
چیف آف آرمی سٹاف جنرل عاصم منیر نے کہا ہے کہ معاشی نقصانات روکنے کیلئے غیر قانونی سرگرمیوں کیخلاف کارروائیاں جاری رہیں گی۔
پاک فوج کے شعبہ تعلقات عامہ ( آئی ایس پی آر) آرمی چیف جنرل سید عاصم منیر نے کراچی میں سندھ کی صوبائی ایپکس کمیٹی کے اجلاس میں شرکت کی،اس موقع پر نگراں وزیراعلیٰ سندھ جسٹس (ریٹائرڈ) مقبول باقر موجود تھے۔
بیان کے مطابق اجلاس کے شرکا کو نظرثانی شدہ نیشنل ایکشن پلان، سندھ کے کچے کے علاقے میں آپریشن، سی پی ای سی، نان سی پی ای سی، پرائیویٹ پراجیکٹس پر کام کرنے والے غیر ملکی شہریوں کی سکیورٹی، غیر قانونی غیر ملکیوں کی وطن واپسی، غیر ملکی کرنسی کو ریگولرائز کرنے کے اقدامات، کراچی ٹرانسفارمیشن پلان، سندھ میں ایس آئی ایف سی کے اقدامات پر پیشرفت اور گرین سندھ کے اقدامات پر بریفنگ دی گئی۔
اجلاس سےخطاب کرتے ہوئے آرمی چیف جنرل سید عاصم منیر نے کہا کہ قانون نافذ کرنے والے ادارے اور دیگر سرکاری محکمے غیر قانونی سرگرمیوں کے خلاف کارروائیوں کو پوری طاقت کے ساتھ جاری رکھیں گے تاکہ وسائل کی چوری اور ان سرگرمیوں کی وجہ سے ملک کو ہونے والے معاشی نقصانات کو روکا جا سکے۔
جنرل عاصم منیر نے تاریخی اقدامات کے استفادہ کیلئے تمام متعلقہ محکموں کے درمیان ہم آہنگی کی ضرورت پر زور دیا۔شرکاء نے اس بات کا اعادہ کیا کہ ریاستی ادارے، سرکاری محکمے اور عوام صوبے کی ترقی اور خوشحالی کے لیے متحد ہیں۔
قبل ازیں آرمی چیف کی آمد پر کور کمانڈر کراچی نے استقبال کیا۔
