نگراں وزیر اعلیٰ سندھ کی اورنج لائن کی بسوں کو گرین لائن میں ضم کرنے کی منظوری

نگراں وزیر اعلیٰ سندھ جسٹس (ر) مقبول باقر نے اورنج لائن کی بسوں کو گرین لائن میں ضم کرنے کی منظوری دے دی۔
نگراں وزیراعلیٰ سندھ کی زیرصدارت ٹرانسپورٹ سےمتعلق اجلاس ہوا، جس میں اورنج لائن کو گرین لائن میں ضم کرنے کی منظوری دی گئی۔
جسٹس (ر) مقبول باقر نے کہا کہ اورنج لائن سندھ حکومت کا پروجیکٹ ہے، رواں ماہ کراچی سرکلر ریلوے کے منصوبے کو منظور کروانے کی بھی کوشش کی جائے گی۔
اجلاس میں نگراں وزیراعلیٰ سندھ کو بریفنگ میں بتایا گیا کہ اورنج لائن کا روٹ لگ بھگ 4 کلومیٹر طویل ہے اورنج لائن پر 20 بسیں چلتی ہیں اورنج لائن کی گرین لائن میں انضمام سے 25 ہزار رائڈرشپ ہوجائے گی، اس وقت اورنج لائن کی روزانہ کی 3 ہزار رائڈرشپ ہے۔
گرین لائن کی یومیہ 55 ہزار رائڈرشپ ہے، فیڈر روٹ شامل ہونے کے بعد گرین لائن کی رائڈرشپ ڈیڑھ سے 2 لاکھ یومیہ ہوجائے گی۔
نگراں وزیراعلیٰ سندھ نے گرین لائن کی رائڈرشپ کو فیڈر روٹس کو شامل کرنے کی ہدایت دے دی۔