پاکستان میں 16 اکتوبرسے پٹرولیم مصنوعات مزید سستی ہونے کا امکان

عالمی سطح پر پٹرولیم مصنوعات کی قیمتوں میں کمی کے بعد پاکستان میں 16 اکتوبر سے پٹرول اور ڈیزل کی قیمتیں کم ہونے کا امکان پیدا ہوگیا ہے۔
یاد رہے نگران حکومت کی جانب سے 30 ستمبر کو پٹرول کی قیمت میں 8 روپے کمی گئی تھی جس کے بعد نئی قیمت 323.38 روپے کی سطح پر ہے جبکہ ہائی سپیڈ ڈیزل بھی 11 روپے سستا کیا گیا اور نئی قیمت 318.18 روپے مقرر کی گئی تھی۔
عالمی سطح پر پٹرولیم مصنوعات کی قیمتوں میں اب 7 ڈالر فی بیرل کی کمی سامنے آئی ہے جس کے بعد ملک میں پٹرولیم مصنوعات مزید سستی ہونے کا امکان ہے۔
جمعرات کے روز گلف مارکیٹ میں خام تیل کی قیمت 92 جبکہ عالمی منڈی میں 84 ڈالر پر آگئی ہے اور اس ریٹ کے مطابق پاکستان میں پٹرول کی قمیت میں 22 روپے کمی بنتی ہے جبکہ ڈیزل کی موجودہ قیمت میں بھی 20 روپے سے زائد کی کمی بنتی ہے۔
ڈالر ریٹ کے مطابق پاکستان میں فی بیرل تیل کی قیمت 26 ہزار 220 روپے ہے جبکہ 15 ستمبر کو 29 ہزار 898 روپے تھی۔
سٹیٹ بینک کے اعدادو شمار کے مطابق پاکستان میں ڈالر کی قیمت میں 20 روپے سے زائد کی کمی ہو چکی ہے جبکہ دوسری جانب 23 دن پہلے درآمد کئے جانے والا پٹرولیم مصنوعات کا سٹاک بھی نکل چکا ہے۔