انصاف ہاؤس کراچی کا مالک 12 سال سے کرایہ نہ ملنے پر عدالت پہنچ گیا
انصاف ہاؤس کراچی کا مالک 12 سال سے کرایہ نہ ملنے پر عدالت پہنچ گیا۔
پاکستان تحریک انصاف (پی ٹی آئی) کراچی کے مرکزی دفتر انصاف ہاؤس کا کرایہ گزشتہ 12 سال سے ادا نہیں کیا گیا جس کی ادائیگی کے لیے مالک نے عدالت سے رجوع کر لیا۔
دفتر کا معاہدہ جگہ کے مالک سے صدر مملکت عارف علوی، نعیم الحق مرحوم اور سابق گورنر سندھ عمران اسماعیل نے کیا تھا۔ معاہدے کے ضمانتی کے طور پر سابق رکن سندھ اسمبلی ثمر علی خان اور فردوس شمیم نقوی نے دستخط کیے تھے۔
انصاف ہاؤس کراچی جس پلاٹ نمبر G-16 پی ای سی ایچ ایس بلاک 6 پر بنا ہے وہ نجی کمپنی کی ملکیت ہے اور کرائے کی ادائیگی نہ ہونے پر پی ٹی آئی قیادت پر معاہدے کی خلاف ورزی کے قانون کی تلوار لٹکنے لگی۔
جگہ کے مالک نے صدر مملکت عارف علوی اور پی ٹی آئی رہنماؤں پر سندھ رینٹل آرڈینس 1969 کے سیکشن 15 کے تحت کیس دائر کر دیا جس پر عدالت کی جانب سے صدر مملکت عارف علوی سمیت پی ٹی آئی رہنماؤں کو نوٹس جاری کر دیا گیا۔
معاہدے کے تحت عارف علوی، عمران اسماعیل اور نعیم الحق ماہانہ ایک لاکھ روپے کرایہ ادا کرنے کے پابند ہیں تاہم صدر مملکت اور پی ٹی آئی قیادت نے 12 سال سے مالک مکان کو کرایہ ادا نہیں کیا۔
