کرنسی کی غیر قانونی ایکس چینج میں ملوث عناصر کے خلاف کریک ڈاؤن

وفاقی تحقیقاتی ایجنسی (ایف آئی اے) کمرشل بینکنگ سرکل کراچی کے ڈائریکٹر کراچی زون عبدالسلام شیخ کی ہدایت پر حوالہ ہنڈی اور کرنسی کی غیر قانونی ایکسچینج میں ملوث عناصر کے خلاف کریک ڈاؤن جاری ہے۔
ڈپٹی ڈائریکٹر کمرشل بینکنگ سرکل کراچی رابعہ قریشی کی زیر نگرانی چھاپہ مار کارروائی میں حوالہ ہنڈی اور کرنسی کی غیر قانونی ایکس چینج میں ملوث ملزم کو گرفتارکر لیا گیا۔ملزم سمیر بغیر لائسنس کے منی چینجر اور حوالہ ہنڈی کا کاروبار کر رہا تھا۔
ملزم کو چھاپہ مار کاروائی میں دہلی کالونی کراچی سے گرفتار کیا گیا۔چھاپے کے دوران ملزم سے 70 ہزار امریکی ڈالر برآمد کر لئے گئے۔ملزم کے موبائل سے ہنڈی حوالہ سے متعلق متعدد رسیدیں اور پیغامات بھی برآمد کرلئے گئے۔ ملزم کے خلاف مقدمہ درج کر کے تفتیش کا آغاز کر دیا گیا ہے۔