سولر نیٹ میٹرنگ کے نرخ کم نہیں کیے جائیں گے، وزیر توانائی

وزیر توانائی محمد علی نے کہا ہے کہ نگران وفاقی حکومت سولر نیٹ میٹرنگ کے نرخوں میں کمی نہیں کر رہی۔
سولر نیٹ میٹرنگ ایک ایسا عمل ہے جو سولر پینلز لگانے والوں کو دن کے وقت پیدا ہونے والی کسی بھی اضافی بجلی کو واپس نیشنل گرڈ کو فروخت کرنے کی اجازت دیتا ہے، جس سے ان کے بجلی کے بلوں میں کمی آتی ہے۔

گورنر سندھ کامران ٹیسوری کے ہمراہ گورنر ہاؤس میں میڈیا سے گفتگو کرتے ہوئے نگران وزیر توانائی نے کہا کہ بجلی چوری کے خلاف ملک بھر میں آپریشن شروع کیا گیا ہے، حکومت بجلی کے نرخوں میں کمی کے لیے پوری کوشش کر رہی ہے۔
وزیر توانائی نے کہا کہ جولائی کے بلوں میں ڈالر کے ریٹ کی وجہ سے بجلی کے نرخ تبدیل ہوئے اور اگست میں واجبات سے زیادہ بجلی کے بل آئے۔