ڈاکٹر عارف علوی کے 5 سالہ عہدہ صدارت کی مدت ختم

ڈاکٹر عارف علوی کے 5 سالہ عہدہ صدارت کی مدت ختم ہوگئی ہے۔
ذرائع کے مطابق صدر عارف علوی نے اپنے قریبی رفقا اورقانونی ٹیم سے مشاورت مکمل کرلی ہے۔
صدر علوی نے نئی منتخب حکومت کے قیام تک اپنے عہدے پرکام جاری رکھنے کا فیصلہ کیا ہے۔
صدر کوقریبی رفقا نے تجویزکیا ہے کہ موجودہ ملکی سیاسی اورمعاشی حالات کو دیکھتے ہوئے صدرمملکت اپنا عہدہ نہ چھوڑیں،صدر کی اپنی قانونی ٹیم نے بھی کام جاری رکھنے کا مشورہ دیا ہے۔
زرائع کے مطابق صدر نے قریبی رفقا کو یقین دہانی کرائی ہے کہ وہ نئے صدرکے انتخاب تک اپنی آئینی ذمہ داریاں جاری رکھیں گے۔
عارف علوی نے 9 ستمبر 2018ء کو عہدے کا حلف اٹھایا تھا۔آرٹیکل 41 کی شق چار کے مطابق صدر کا الیکشن صدارتی مدت ختم ہونے سے زیادہ سے زیادہ 60 اور کم سے کم 30 دن قبل کروایا جائے گا۔
اس دوران اگر اسمبلی توڑ دی گئی ہو تو صدارتی انتخاب عام انتخابات ہونے کے بعد 30 دن کے اندر کروایا جائے گا۔
آئین کے آرٹیکل 44 ایک کے مطابق صدر اپنے عہدے کی میعاد ختم ہو جانے کے باجود نئے صدر کے انتخاب تک اپنے عہدے پر فائز رہیں گے۔