کوہ پیماؤں اور پورٹرز کیلئے 30 لاکھ تک بیمہ اسکیم کا منصوبہ

نگران حکومت نے کوہ پیماؤں اور پورٹرز کے لیے کم از کم 30 لاکھ روپے تک بیمہ اسکیم بنانے کا منصوبہ تیار کر لیا۔
وزیر مملکت برائے سیاحت وصی شاہ کی زیر صدارت اسلام آباد میں اجلاس ہوا جس میں کوہ پیماؤں اور پورٹرز کے لیے خصوصی تربیتی سینٹر بنانے پر غور کیا گیا۔
اجلاس سے خطاب کرتے ہوئے وصی شاہ کا کہنا تھا کہ پاکستان میں سیاحت کے وسیع مواقع موجود ہیں ، ہمیں دنیا کو ان مواقع سے آگاہ کرنے کی ضرورت ہے۔
نگران وزیر نے گزشتہ دنوں کے ٹو سر کرنے کی ایک مہم کے دوران اونچائی سے گر کر جاں بحق ہونے والے پورٹر محمد حسن کی وفات پر شدید دکھ اور افسوس کا اظہاربھی کیا۔
انہوں نے پورٹرز کے لیے کم ازکم 30 لاکھ روپے تک بیمہ سکیم تیار کرنے کے لئے موثر اقدامات اٹھانے کی ہدایت بھی جاری کی۔