نگران وزیراعظم کا بجلی بلوں میں ریلیف دینے کا اعلان
نگران وزیراعظم انوارالحق کاکڑنے 48 گھنٹوں میں عوام کو بجلی بلوں میں ریلیف دینے کا اعلان کردیا۔
اسلام آباد میں صحافیوں سے گفتگو کرتے ہوئےوزیراعظم انوارالحق کاکڑ نے کہا کہ بجلی کا بل تو دینا پڑے گا،معاہدوں کی پاسداری کریں گے،جنہوں نےمسائل پیداکیےاب وہ حل بتا رہے ہیں۔
انہوں نے کہا کہ حالات مشکل ہیں لیکن ملک میں کوئی بحران نہیں،ہمیں معاشی اورسیکیورٹی کےمسائل ہیں، بجلی کے بلوں کامعاملہ آئی ایم ایف کےساتھ ملکر دیکھ رہے ہیں،48 گھنٹے میں بجلی بلوں پرریلیف کا اعلان کریں گے۔
انکا کہنا تھا کہ 90کی دہائی میں ہمارے یہاں لوڈشیڈنگ بڑا مسئلہ تھا، منگلااورتربیلاکےبعد ہم کوئی بڑا پروجیکٹ نہیں کرپائے،مسئلےکےحل کیلئےہم نےآئی پی پیزسے معاہدےکیے۔
نگران وزیراعظم نے کہا کہ بجلی بلوں کےحوالےسےاحتجاج ہوا ،ایک شہرمیں بل جلائےجا رہے ہیں اسی شہرمیں بجلی چوری ہورہی ہے ، مگرمسئلہ بڑھاچڑھاکرپیش کیاجارہا ہے،بجلی بحران کی وجہ لائن لاسز،چوری اورآئی پی پیزکے معاہدے ہیں ، بجلی بلوں پرایسا نہیں کہ چند ظالم حکمران عوام کاخون چوس کرچھوڑیں گے۔
انہوں نے کہا کہ فوج ایک بھی مفت یونٹ استعمال نہیں کررہی اورفوج،نیوی اورایئرفورس اپنےبجٹ سےبجلی استعمال کرتےہیں،صرف واپڈا کے ملازمین فری بجلی استعمال کررہے ہیں،ہم نے پاور سیکٹر کو سمجھنے کی کوشش کی ہے اوربجلی بلوں میں اضافے کے مسئلے پرغورکیاہے۔
نگران وزیر اعظم نے کہا کہ ایس آئی ایف سی میں شامل 4سے5ایریازمیں بہت زیادہ صلاحیت ہے،آئی ٹی،معدنیات،زراعت اور دفاعی پیداوار اہم ایریاز ہیں،توانائی کےشعبےمیں پیداوار، ترسیل اور وصولیوں کےنظام میں نقائص ہیں۔
انکا کہنا تھا کہ کوئی دہشتگرد ملک کی کسی یوسی کوبھی ٹیک آورنہیں کرسکتا،بیانیہ بنایا جا رہا ہےکہ ملک کلیپس کرنے لگا ہے،ہم نے مسئلے کو ٹالنا ہے تو یہ ٹالا ہوا مسئلہ پھرسامنے آئےگا۔
انوارالحق کاکڑ کا یہ بھی کہنا تھا کہ ہمارےیہاں سیاسی عدم استحکام بھی بڑامسئلہ ہے،ملک میں عام انتخابات اپنے وقت پر ہوں گے۔تمام سیاسی جماعتیں اس وقت الیکشن موڈ میں ہیں، ہمارا کام الیکشن کمیشن کی معاونت کرنا ہے،الیکشن کمیشن ہم سے جوکہےگاہم انہیں فراہم کریں گے،کوشش ہےشفاف الیکشن کرواکرعزت سے رخصت ہوکرچلےجائیں۔
خیال رہے کہ ملک بھر میں بجلی کے زائد بلوں کیخلاف عوام سراپا احتجاج ہیں ، اورلاہور ، کراچی ،پشاوراورکوئٹہ سمیت ملک کے چھوٹے بڑے شہروں میں مظاہرے کیے جارہےہیں ،مظاہرین کی جانب سے بجلی کے بلوں کو نذر آتش کیا جا رہا ہے۔
