ایشیا کپ کا میلہ سجنے کو تیار، ختم ہوا شائقین کرکٹ کا انتظار
ایشیا ء کپ 2023 کا میلہ 15 برس بعد آج ملتان سٹیڈیم میں سجے گا۔ ایشیاء کپ 2023 کی میزبانی مشترکہ طور پر پاکستان اور نیپال کریں گے۔
ایشیا کپ ایشیا کپ 2023 میں 6 ٹیمیں میدان میں اتریں گی۔ کرکٹ کی تاریخ میں پہلی مرتبہ ایسا ہو رہا ہے کہ ایشیاء کپ کی میزبانی ایک سے زائد ممالک کر رہے ہیں۔
ایشیاء کپ 2023 کے 4 میچز پاکستان میں کھیلے جا ئیں گے۔ افتتاحی میچ پاکستان اور نیپال کے درمیان آج ملتان میں کھیلا جائے گا جبکہ دیگر 3 میچز لاہور میں کھیلے جائیں گے۔
افتتاحی میچ میں آج پاکستان اور نیپال کی ٹیمیں میدان میں اتریں گی۔ افتتاحی میچ کے 70 فیصد ٹکٹ فروخت ہوچکے ہیں۔ ملتان کرکٹ سٹیڈیم کے اطراف میں ہزاروں سکیورٹی اہلکار تعینات کر دیئے گئے ہیں۔
ٹیم میں تین تبدیلیوں کے ساتھ پلیئنگ الیون کا اعلان کر دیا گیا ہے۔ قومی ٹیم کے کپتان بابر اعظم نے کہا ہے کہ انڈیا پاکستان کا میچ ہائی وولٹیج ہوتا ہے۔ تمام میچز پاکستان میں ہوتے تو خوشی ہوتی لیکن ہم جیت کا مومینٹم برقرار رکھنے کی کوشش کریں گے۔
پہلے میچ سے قبل رنگارنگ افتتاحی تقریب منعقد ہوگی جس میں آتش بازی کے ساتھ پاکستانی گلوکارہ آئمہ بیگ اور نیپالی گلوکارہ تھریشالہ گرونگ اپنی آواز سے کھلاڑیوں کاحوصلہ بڑھائیں گی۔
ملتان سٹیڈیم کے گیٹ صبح 11بجے کھول دیئے جائیں گے جبکہ شائقین کرکٹ کے لیے فاطمہ جناح ٹاؤن سے فری بس سروس بھی چلائی جائے گی
