سائفر کیس کی سماعت، آفیشل سیکرٹ ایکٹ عدالت کے جج اٹک جیل پہنچ گئے
آفیشل سیکرٹ ایکٹ عدالت کے جج ابو الحسنات ذوالقرنین چیئرمین تحریک انصاف کے خلاف سائفر کیس کی سماعت کیلئے اٹک جیل پہنچ گئے۔
جج ابو الحسنات ذوالقرنین اپنی گاڑی خود ڈرائیو کر کے اٹک جیل پہنچے جہاں وہ پاکستان تحریک انصاف کے چیئرمین کے خلاف سائفر کیس کی سماعت کریں گے۔
وزارت قانون کی جانب سے گزشتہ روز اٹک جیل میں ہی سائفر کیس کی سماعت کے حوالے سے نوٹیفکیشن جاری کیا گیا تھا، سکیورٹی وجوہات کی بنیاد پر سائفر کیس کی سماعت اٹک جیل میں منتقل کی گئی ہے
چیئرمین تحریک انصاف کی لیگل ٹیم کو جیل کے اندر جانے کی اجازت مل گئی، بیرسٹر سلمان صفدر، انتظار پنجوتھہ، نعیم پنجوتھہ کو جیل کے اندر جانے کی اجازت دے دی گئی۔
قبل ازیں پولیس کی جانب سے صرف ایک وکیل کو جیل کے اندر جانے کی اجازت دی گئی تھی تاہم طویل انتظار کے بعد چیئرمین پی ٹی آئی کے وکلاء کو جیل کے اندر جانے کی اجازت دے دی گئی۔
