جسٹس ریٹائرڈ مقبول باقر نگراں وزیراعلیٰ سندھ نامزد

جسٹس ریٹائرڈ مقبول باقر کو نگراں وزیراعلیٰ سندھ نامزد کر دیا گیا۔
ذرائع کے مطابق پاکستان پیپلز پارٹی ( پی پی پی ) اور متحدہ قومی موومنٹ ( ایم کیو ایم ) کے درمیان نگران وزیر اعلیٰ کے معاملے پر اتفاق ہوگیا ہے اور جسٹس ریٹائرڈ مقبول باقر کو نگراں وزیراعلیٰ سندھ نامزد کر دیا گیا ہے۔
وزیر اعلیٰ سندھ کے ترجمان نے بتایا کہ وزیراعلی سندھ اور اپوزیشن لیڈر میں مشاورت کے بعد جسٹس ریٹائرڈ مقبول باقر کے نام پر اتفاق ہوگیا ہے اور دونوں رہنماؤں نے انہیں نگران وزیراعلی بنانے کے لیے گورنر سندھ کو سفارش کی ہے۔
ترجمان کا کہنا تھا کہ وزیراعلی اور اپوزیشن لیڈر میں آرٹیکل 224 ون اے کے تحت مشاورت ہوئی، اتفاق رائے کیلئے 12،13 اور 14 اگست کو مشاورتی ملاقاتیں ہوئیں، مشاورت کے دوران متعدد ناموں پر غور و خوض کیا گیا۔
مقبول باقر سپریم کورٹ کے جج کی حیثیت سے ریٹائرہوئے تھے اور وہ سندھ کے آٹھویں نگراں وزیراعلیٰ ہوں گے۔
نامزدگی پر رد عمل دیتے ہوئے جسٹس ریٹائرڈ مقبول باقر کا کہنا تھا کہ معتبر صاحبان سے بات ہوئی ہے، متعلقہ لوگوں نے بتایا ہے کہ معاملہ طے ہوگیا ہے، کچھ دن سے نگران وزیراعلیٰ سندھ کیلئےبات چیت چل رہی تھی، حلف برداری کے حوالے سے ابھی کوئی بات نہیں ہوئی، ہوسکتا ہے کہ حلف برداری کل ہو یا ایک، دو دن بعد ہو۔
جسٹس مقبول باقر کون ہیں ؟
جسٹس مقبول باقر کراچی میں 5 اپریل 1957 کو پیدا ہوئے، ابتدائی تعلیم کراچی سے ہی حاصل کی ، جامعہ کراچی سے ایل ایل بی کیا ، 1981 میں بطور وکیل انرول ہوئے ، وکالت کے دوران ہر قسم کے مقدمات بالخصوص کارپوریٹ کیسز میں مہارت حاصل کی۔
مقبول باقر 26 اگست 2002 کو سندھ ہائی کورٹ کے ایڈیشنل جج تعینات ہوئے ، 26 اگست 2003 کو سندھ ہائی کورٹ کے مستقل جج بن گئے، جنرل مشرف نے نومبر2007 میں ایمرجنسی نافذ کی تو جسٹس مقبول باقر نے پی سی او کا حلف اٹھانے سے انکار کردیا جس کی پاداش میں دیگر ججز کی طرح معزول کردیے گئے ۔
وکلا اور سول سوسائٹی کی عدلیہ بحالی تحریک کی کامیابی پر 2008 میں سندھ ہائی کورٹ کے جج کے طور پر بحال ہوئے، انہیں 20 ستمبر 2013 کو سندھ ہائی کورٹ کا چیف جسٹس مقرر کیا گیا ، چیف جسٹس کی حیثیت سے سندھ ہائی کورٹ میں کئی اہم فیصلے کیے۔
انہیں 17 فروری 2014 کو سپریم کورٹ کا جج مقرر کیا گیا اور وہ 4 اپریل 2022 کو سپریم کورٹ سے ریٹائڑ ہوئے۔