ڈیجیٹل لون ایپس کے صارفین کے لئے قرض کی حد مقرر

سیکیوریٹیز اینڈ ایکسچینج کمیشن آف پاکستان (ایس ای سی پی ) نے لائسنس یافتہ ڈیجیٹل لون ایپس کے صارفین کے تحفظ کے لئے قرض کی حد مقرر کردی۔
تفصیلات کے مطابق سیکیوریٹیز اینڈ ایکسچینج کمیشن آف پاکستان نے ڈیجیٹل لون ایپس کے صارفین کے تحفظ کیلئے مزید اقدامات کرتے ہوئے لائسنس یافتہ ایپس سے لینے والے قرض کی حد مقرر کر دی۔
ایس ای سی پی کی جانب سے جاری اعلامیہ کے مطابق ایک صارف کیلئے ایپ سے قرض حاصل کرنے کی زیادہ سے زیادہ حد مقرر کر دی گئی ہے جس کے مطابق صارف ایک وقت میں 25 ہزار روپے تک قرض حاصل کرسکتا ہے۔
اعلامیہ میں کہا گیا کہ صارف کا تمام لون ایپس سے حاصل کردہ قرض 75,000 روپے سے زائد نہیں ہوسکتا اور پرسنل لون ایپس کے ذریعے قرض کی زیادہ سے زیادہ مدت 90 دن سے زائد نہیں ہوسکتی۔