صحافیوں کی جدوجہد رنگ لے آئی، حکومت نے پیمرا ترمیمی بل 2023 واپس لے لیا

صحافیوں کی جدوجہد رنگ لے آئی، حکومت نے پیمرا ترمیمی بل 2023 واپس لے لیا۔
تفصیلات کے مطابق سینیٹ کی قائمہ کمیٹی برائے اطلاعات کے اجلاس میں وزیر اطلاعات نے پیمرا ترمیمی بل 2023 واپس لینے کا اعلان کر دیا۔
وزیر اطلاعات مریم اورنگزیب نے کہا ہم پیمرا کے پرانے سیاہ قانون کو ختم کرنا چاہتے تھے، 4 سال اپوزیشن میں رہتے ہوئے میڈیا کے ساتھ کام کیا، ہم نے مخلصانہ سوچ اور بڑی محنت سے یہ بل تیار کیا تھا۔
انھوں نے کہا ہم بل کی بعض شقوں کے حوالے سے آنے والے تحفظات کا احترام کرتے ہیں، آئینی و جمہوری سوچ پر کوئی سمجھوتہ نہ کبھی کیا اور نہ ہی کر سکتے ہیں، میڈیا، اظہار رائے، شہری آزادیوں کے آئینی حق پر سمجھوتہ نہیں کریں گے۔
مریم اورنگزیب کا کہنا تھا کہ جبر، آمریت، فسطائیت کے خلاف میڈیا کے ساتھ مل کر ہمیشہ جدوجہد کی، ہم ایسا اقدام نہیں کر سکتے جس سے یہ تاثر پیدا ہو کہ ہمیں میڈیا کی آزادی عزیز نہیں۔ انھوں نے کہا میڈیا نمائندہ تنظیمیں، اسٹیک ہولڈرز پہلے دن سے مشاورت اور بل کی تیاری کا حصہ رہے، ہم نے پہلے دن سے یہی کہا تھا کہ متفقہ طور پر ہی بل منظور کرائیں گے۔
وزیر اطلاعات نے مزید کہا کہ پیمرا آرڈیننس 2002 پرویز مشرف کا کالا قانون تھا، آرٹیکل 19 کو پیمرا بل میں شامل کرنے کا مقصد آزادی اظہار رائے کو یقینی بنانا ہے، بل پر تمام اراکین اور اسٹیک ہولڈرز کی رائے کا احترام کرتے ہیں، اس لیے اس بل کو ادھر ہی چھوڑ کر جا رہی ہوں اب جو حکومت بھی آئے گی وہ بل پر بحث کر لے گی۔