اٹلی میں مہاجرین کی کشتیاں ڈوبنے سے درجنوں افراد لاپتہ

اٹلی میں طوفانی سمندر میں کشتیاں ڈوبنے سے 31 تارکین وطن لاپتہ ہو گئے۔
بین الاقوامی میڈیا رپورٹس کے مطابق اطالوی جزیرے Lampedusa پر کشتیاں ڈوبنے کے نتیجے میں درجنوں افراد ڈوب گئے جب کہ دو لاشیں نکال لی گئی ہیں۔
اطالوی کوسٹ گارڈ کا کہنا ہے کہ اس نے دو لاشیں نکالی ہیں اور 57 افراد کو بچا لیا ہے۔ خیال کیا جارہا ہے کہ دو کشتیوں کو حادثہ پیش آیا ہے اور ممکنہ طور پر یہ کشتیاں جمعرات کو تیونس میں Sfax سے روانہ ہوئی تھیں۔
اطالوی خبر رساں ایجنسی اے این ایس اے کے مطابق ایک کشتی میں 48 اور دوسرے میں 42 افراد سوار تھے۔
پریس آفیسر فلاویو ڈی جیاکومو نے خبر رساں ادارے اے ایف پی کو بتایا کہ زندہ بچ جانے والوں سے حاصل ہونے والی معلومات کے مطابق کم از کم 30 سے زائد افراد اب بھی لاپتہ ہیں۔
قریبی اطالوی جزیرے سسلی پر واقع ایگریجنٹو میں کشتی کے تباہ ہونے کی تحقیقات شروع کر دی گئی ہیں۔ اطالوی گشتی کشتیوں اور غیر سرکاری تنظیموں کے گروپوں کے ذریعے سمندر میں بچائے جانے کے بعد گزشتہ چند دنوں میں 2,000 سے زیادہ لوگ لامپیڈوسا پہنچے ہیں، کیونکہ تیز ہواؤں نے جزیرے کے ارد گرد کی صورتحال کو مزید پیچیدہ بنا دیا ہے۔