پاکستان میں پاسپورٹ کی مدت میں تجدید کے لیے مقررہ فیس میں اضافہ
پاکستانی حکومت نے آن لائن اور آف لائن پاسپورٹ رینیو کروانے کی فیس میں اضافہ کردیا ہے۔
میڈیا رپورٹس کے مطابق نارمل پاسپورٹ کی مدت میں تجدید کروانے کے لیے شہریوں کو اب ایک ہزار روپے اضافی دینے ہوں گے۔ حالیہ اضافہ کے بعد نارمل پاسپورٹ کی تجدید کروانے کی فیس 3 ہزار سے بڑھ کر 4 ہزار ہو گئی ہے۔
دوسری جانب پاسپورٹ کو ارجنٹ تجدید کروانے کی فیس میں بھی ایک ہزار روپے کا اضافہ کیا گیا ہے جس کے بعد اس کی فیس 5 ہزار سے بڑھ کر 6 ہزار ہو گئی ہے۔
اس فیس کا اطلاق آن لائن اور آف لائن دونوں طریقوں سے پاسپورٹ کی تجدید کروانے پر ہو گا۔
پاکستان کی وزارت داخلہ کے مطابق فیس میں دراصل کوریئر کے اخراجات ہیں جس کے استعمال سے پاسپورٹ شہریوں کے گھروں تک پہنچائے جاتے ہیں۔
شہریوں کو پاسپورٹ آن لائن تجدید کروانے کے لیے اپنے قومی شناختی کارڈ کی کاپی اور ایکسپائر ہونے والے پاسپورٹ کی کاپی ڈائیریکٹوریٹ جنرل آف امیگریشن اینڈ پاسپورٹس کی ویب سائٹ پر لازمی آن لائن جمع کروانا ہو گی۔
یاد رہے کہ پاسپورٹ آن لائن تجدید کی درخواست دینے والے شہریوں کو فیس بھی آن لائن ہی جمع کروانی ہو گی۔
