عراق نے پاکستانی زائرین کیلئے ویزہ فیس ختم کردی

وفاقی وزیر داخلہ رانا ثناء اللہ عراقی ہم منصب کی خصوصی دعوت پر 4 روزہ دورے کیلئے عراق پہنچ گئے، عراقی وزیر داخلہ عبدالامیر الشماری، سفیراحمد امجد علی اور دیگر افسران نے ان کا استقبال کیا۔
وزیر داخلہ نے عراقی وزیراعظم محمد شیاع السودانی سے ملاقات کی جس کے دوران دفاع اور انسداد دہشتگردی سمیت مختلف شعبوں میں تعاون بڑھانے پر اتفاق ہوا۔
عراقی وزیراعظم نے پاکستانی زائرین کیلئے ویزہ فیس ختم کرنےکی منظوری دی جبکہ پاکستانی سرمایہ کاروں کو ایک ہفتے میں الیکٹرانک ویزے کی سہولت فراہم کرنے کا فیصلہ کیا اور معمولی جرائم پرعراقی جیلوں میں قید پاکستانیوں کی جلد رہا کرنے کی ہدایت بھی جاری کی۔
علاوہ ازیں رانا ثنا اللہ نے عراقی صدر ڈاکٹرعبداللطیف رشید سے ملاقات کی جس کے دوران دونوں ممالک کے درمیان تجارت، دفاع اور آئی ٹی کے شعبے میں تعاون بڑھانے پر اتفاق کیا گیا۔
ملاقات کے دوران رانا ثنا اللہ کا کہنا تھا کہ دونو ں ممالک نے دہشتگردی کیخلاف جنگ میں بےشمار قربانیاں دیں، پاکستان عراقی وزارت داخلہ کے ساتھ بھرپور تعاون کا خواہاں ہے جبکہ عراقی صدر کا کہنا تھا کہ پاکستانی فوج نے دہشتگردی کیخلاف گراںقدر خدمات سر انجام دی ہیں۔
وزیرداخلہ نے عراقی ہم منصب عبدالامیرالشماری سے بھی ملاقات کی اور زائرین کو سہولیات کی فراہمی انکا شکریہ ادا کیا اس دوران اربعین کے دوران پاکستانی زائرین کا کوٹہ ایک لاکھ کرنے کا فیصلہ کیا گیا اور پاکستانی زائرین کو گروپ ویزہ کےعلاوہ انفرادی ویزہ جاری کرنے کی بھی منظوری دی گئی۔
عراقی وزیرداخلہ نے پاکستانی زائرین کیلئے ویزہ فیس میں کمی کی بھی یقین دہانی کروائی۔
ان کا کہنا تھا کہ پاکستانی زائرین کو ہر ممکن سہولت فراہم کرنے کیلئےکوشاں ہیں، انہوں نے پولیس اکیڈمی اور فرانزک کے شعبہ میں تربیت کی پیشکش کا خیرمقدم بھی کیا۔