نگران وزیراعظم کون ہوگا، اتحادیوں کو 2 دن میں نام دینے کی ڈیڈ لائن

حکومتی اتحادپاکستان ڈیموکریٹک موومنٹ پی ڈی ایم میں شامل تمام جماعتوں کو دو دن میں نگران وزیراعظم کیلئے اپنی قیادت سے مشاورت کے بعد نام دینے کی ڈیڈلائن دے دی گئی۔
باخبر ذرائع کے مطابق نگران سیٹ اپ کی تشکیل کیلئے حکومتی اتحادیوں جماعتوں کے رہنماؤں کامشاورتی اجلاس پارلیمنٹ ہاؤس میں ہوا، جس میں پیپلز پارٹی، ن لیگ، مسلم لیگ ق، جمہوری وطن پارٹی اور دیگر اتحادی جماعتوں نے شرکت کی۔
ذرائع نے بتایا کہ اجلاس میں تمام سیاسی جماعتوں کو 2 دن میں نگران وزیراعظم کیلئے نام دینے کی ڈیڈلائن دے دی گئی، اجلاس میں فیصلہ کیا گیا کہ تمام سیاسی جماعتیں پارٹی قیادت کی مشاورت سے 2 دن میں نام دیں۔
یاد رہے کہ موجودہ قومی اسمبلی کی مدت 12 اگست کو پوری ہو رہی ہے اور گزشتہ دنوں وزیراعظم شہباز شریف نے اعلان کیا تھاکہ ہم مدت پوری ہونے سے پہلےحکومت چھوڑ دیں گے اور نگران حکومت آئے گی۔