نواسہ رسول ﷺ امام حسینؓ کی عظیم قربانی کی یاد میں ملک بھر میں جلوس اور مجالس

نواسہ رسول صلی اللہ علیہ وسلم سیدنا امام حسین رضی اللہ عنہ کی عظیم قربانی کی یاد میں یوم عاشورہ کے موقع پر ملک بھر میں مجالس کا اہتمام کیا گیا اور ماتمی جلوس نکالے گئے جو اپنے روایتی اور مقررہ راستے سے ہوتے ہوئے اپنی منزلوں پر پہنچ کر اختتام پذیر ہوگئے۔
جلوسوں کے روٹس پر سیکیورٹی کے غیرمعمولی انتظامات کئے گئے تھے۔ جلوسوں کے روٹس پر موبائل فون سروس معطل رہی، اورموٹر سائیکل کی ڈبل سواری پر بھی پابندی جبکہ راستے کنٹینر لگا کرسیل کردیے گئے تھے۔
کراچی
کراچی میں 10 محرم الحرام یوم عاشور کا مرکزی جلوس نشترپارک سے برآمد ہوکر اپنی مقررہ راستوں سے ہوتا ہوا حسینیہ ایرانیان کھارادر پراختتام پذیر ہوگیا۔ جلوس کی قیادت پاک بوتراب اسکاؤٹس کے دستتے نے کی ۔ جلوس کے شرکاء نے تبت سینٹر پر نماز ظہرین ادا کی۔
وزیراعلیٰ سندھ مرادعلی شاہ نے کراچی میں یوم عاشور کے مرکزی جلوس کا فضائی جائزہ لیا اور سی پی او میں قائم کمانڈ اینڈ کنٹرول روم کا دورہ کیا۔ وزیراعلیٰ سندھ کو کمانڈ اینڈ کنٹرول سینٹر میں آئی جی سندھ نے بریفنگ دی ۔
وزیراعلیٰ نے جلوس کی مانیٹرنگ کا جائزہ بھی لیا ، اورمختلف عمارتوں پر تعینات اہلکاروں کی پوزیشن بھی دیکھی اور تلاش ایپ کا معائنہ کیا۔
حیدرآباد میں یوم عاشور کا مرکزی جلوس قدم گاہ مولاعلی سے برآمد ہوا، جو اپنے مقررہ راستوں سے ہوتا ہوا اپنی منزل پر پہنچ کر اختتام پذیر ہوگیا، جلوس میں 200ماتمی وتعزیہ جلوس شامل تھے،جلوس کی سیکیورٹی پر5ہزارپولیس اہلکاروں تعینات تھے۔اور7واک تھروگیٹ لگائے گئے تھے۔
یوم عاشور کے موقع پر بوھری بازار میں بوھری برادری کی جانب سے عزاداروں کی بھوک مٹانے کے لئے لنگر و نیاز کے اہتمام کے ساتھ سبیلوں کی کئمپ بھی قائم کی گئی تھی۔
لاہور
لاہور میں یوم عاشورہ کا مرکزی جلوس نثار حویلی سے برآمد ہوکر مقررہ راستوں سے ہوتا ہوا، کربلا گامے شاہ پہنچ کر اختتام پذیر ہوگیا، جلوس کے شرکا نے رنگ محل چوک میں نماز ظہرین ادا کی۔
جلوس کی سیکیورٹی کے فول پروف انتظامات کیے گئے تھے،پنجاب پولیس کے11 ہزار اہلکار جلوس کی سیکیورٹی پر تعینات تھے۔ نگران وزیر اعلیٰ پنجاب محسن نقوی نے کربلا گومے شاہ پہنچ کر جلوس کی سکیورٹی اور دیگر انتظامات کا جائزہ لیا۔