خیبرپختونخوا اور آزاد کشمیر میں بارشوں کے دوران حادثات میں 147 افراد جاں بحق

خیبرپختونخوا اور آزاد کشمیر میں بارشوں کے دوران مختلف حادثات میں 14 افراد جاں بحق اور متعدد زخمی ہوگئے، درجنوں گھر تباہ، املاک کو نقصان پہنچا جبکہ 50 سے زائد مویشی بھی ہلاک ہوئے۔
رپورٹ کے مطابق خیبرپختونخوا میں طوفانی بارشوں اور سیلابی ریلوں سے 9 افراد جاں بحق اور 7 زخمی ہوئے جبکہ 67 گھروں کو نقصان پہنچا، سب سے زیادہ متاثر اپر اور لوئر چترال کے اضلاع میں ایمرجنسی نافذ کردی گئی ہے۔
پی ڈی ایم اے رپورٹ کے مطابق صوبہ بھر میں 7 گھر مکمل تباہ، 67 گھروں کو جزوی نقصان پہنچا جبکہ 47 مویشی سیلاب کی نذر ہوگئے۔
ریسکیو 1122 اور دیگر اداروں نے امدادی سرگرمیاں شروع کردی ہیں جبکہ بند سڑکوں کو کھولنے کیلئے بھی اقدامات اٹھائے جارہے ہیں۔ نگراں وزیراعلیٰ نے جاں بحق افراد کے ورثاء اور زخمیوں کو فوری امدادی چیکس دینے کی ہدایت کردی۔
بارشوں اور سیلابی ریلوں سے اپر اور لوئر چترال سب سے زیادہ متاثر ہوئے ہیں جہاں 15 اگست تک ایمرجنسی نافذ کردی گئی ہے جبکہ بارشوں سے متاثرہ اضلاع کیلئے 6 کروڑ روپے جاری کردیئے گئے ہیں۔
اسٹیٹ ڈیزاسٹر مینجمنٹ اتھارٹی آزاد کشمیر میں بارش سے ہونیوالے نقصانات کی تفصیلات نے جاری کردیں۔ جس کے مطابق 5 افراد جاں بحق اور 5 زخمی ہوئے، 29 رہائشی مکانات مکمل تباہ جبکہ 80 جزوی طور پر تباہ ہوئے۔
رپورٹ کے مطابق 7 دکانیں، 8 مویشیوں کے باڑے بھی تباہ ہوئے، وادی نیلم کے گاؤں تہجیاں اور ٹھنڈا پانی کی سڑکیں اور کئی رابطہ پل تباہ ہوگئے۔