پاکستان،ازبکستان اورافغانستان میں ریلوے منصو بے پر دستخط ہوگئے

پاکستان ،ازبکستان اورافغانستان (یواے پی) ریلوے منصو بے کے جوائنٹ پروٹوکول پر دستخط کردئیے گئے۔
سیکریٹری اورچیئرمین پاکستان ریلویز سید مظہر علی شاہ، افغانستان ریلوے اتھارٹی کے ڈائریکٹر جنرل اور سی ای او الحاج بخت الرحمان شرافت اورجمہوریہ ازبکستان کی وزارت سرمایہ کاری، صنعت اور تجارت اور محکمہ ٹرانسپورٹ کے سربراہ دیکھکانوف ڈی ٹی نے مفاہمت کی یادداشت پہ دستخط کئے۔
تقریب میں وفاقی وزیر ریلویز خوا جہ سعد رفیق ، وفاقی وزیرخزانہ سینٹراسحاق ڈار اور تینو ں ممالک کے اعلیٰ حکام نے شرکت کی۔خواجہ سعد رفیق نے کہا کہ آج پاکستان، افغانستان اور ازبکستان ریلویز کے لئے بہت اہم دن ہے، ریجنل کنیکٹیوٹی کے لئے آج ایک تاریخی دن ہے جس کی بنیاد آج ہم نے اس منصوبے سے رکھ دی ہے۔
انہوں نے کہا کہ منصوبے کے تحت ترمیز، مزار شریف،لوگر، خرلاچی روٹ کے ذریعے ازبکستان ریلوے کو پاکستان ریلوے سے جوڑنا ہے ، پراجیکٹ شریک ممالک کے درمیان علاقائی، ٹرانزٹ اور دو طرفہ تجارت میں سہولت فراہم کرے گا۔
سعدرفیق نےکہا کہ منصو بے سے خطے کے لوگوں کے درمیان بہتر روابط میں بھی اضا فہ ہو گا، ریلوے لائن مسافروں اور مال بردار سروسز دونوں کو سپورٹ کرے گی اور علاقائی تجارت اور اقتصادی ترقی میں اہم کردار ادا کرے گی۔