جڑواں شہروں راولپنڈی اور اسلام آباد میں 600 سے زائد غیر قانونی ہاؤسنگ سوسائٹیز

قومی اسمبلی کی قائمہ کمیٹی برائے موسمیاتی تبدیلی کے اجلاس میں انکشاف ہوا ہے کہ جڑواں شہروں راولپنڈی اور اسلام آباد میں 600 سے زائد غیر قانونی ہاؤسنگ سوسائٹیز ہیں۔
چیئرمین سی ڈی اے نورالامین مینگل نے قومی اسمبلی کی قائمہ کمیٹی برائے موسمیاتی تبدیلی کے اجلاس میں انکشاف کیا کہ اسلام آباد میں 150 اور راولپنڈی میں 318 غیر قانونی ہاؤسنگ سوسائٹیاں ہیں، فتح جنگ میں بھی 100 کے قریب غیر قانونی ہاؤسنگ سوسائٹیاں ہیں۔
چیئرپرسن قائمہ کمیٹی نے استفسار کیا کہ سی ڈی اے غیر قانونی سوسائٹیز کے خلاف کیا کر رہی ہے؟ سی ڈی اے غیر قانونی سوسائٹیوں کی فہرست جاری کرے، عوام کو اشتہار کے ذریعے غیر قانونی سوسائٹیوں کے بارے میں آگاہ کیا جائے۔
قائمہ کمیٹی کے ارکان کا کہنا تھا کہ غیر قانونی ہاؤسنگ سوسائٹیاں اپنی سرگرمیاں جاری رکھے ہوئے ہیں جب کہ چیئرپرسن کمیٹی نے کہا کہ ہاؤسنگ سوسائٹیاں ماحولیات کو ناقابل تلافی نقصان پہنچا رہی ہیں۔
ڈی جی پاکستان انوائرمینٹل پروٹیکشن ایجنسی (پی ای پی اے) فرزانہ الطاف شاہ کا کہنا ہے کہ ہاؤسنگ سوسائٹیز سے ماحولیاتی رپورٹس طلب کر لی ہیں، ماحولیاتی معیار پر پورا نہ اترنے والی لیگل سوسائٹیز کا این او سی ایک ہفتے میں منسوخ کر دیا جائے گا