بیرون ملک پاکستانیوں کی ترسیلات زر میں 4 ارب ڈالرز کی کمی ریکارڈ

بیرون ملک پاکستانیوں کی ترسیلات زر میں رواں برس 4 ارب ڈالرز کی کمی ریکارڈ کی گئی۔
اسٹیٹ بینک آف پاکستان کی جانب سے جاری کردہ اعداد و شمار کے مطابق مالی سال 2023،24 میں اوور سیز پاکستانیوں نے مجموعی طور پر 27 ارب ڈالر وطن بھیجے، جو سالانہ بنیادوں پر گزشتہ سال کے مقابلے میں 4 ارب ڈالرز کم ہے۔
اسٹیٹ بینک کے مطابق ماہانہ بنیاد پر ترسیلات زر میں 4 فیصد اضافہ دیکھا گیا، اور صرف ماہ جون میں بیرون ملک مقیم پاکستانیوں نے دو ارب 20 کروڑ ڈالرز کی ترسیلات پاکستان بھیجیں.
رپورٹ میں بتایا گیا کہ جون میں سب سے زیادہ 52 کروڑ ڈالر کا زرمبادلہ سعودیہ عرب سے پاکستانیوں نے بھیجا تھا، جب کہ برطانیہ 34 کروڑ اور یواے ای کے پاکستانی 33 کروڑ ڈالرز بھیج کر سرفہرست رہے ہیں۔
اعداد و شمار کے مطابق سعودی عرب میں مقیم پاکستانی کی جانب سے سالانہ بنیادوں پر 6 ارب 44 کروڑ کا زرمبادلہ پاکستان بھیجا گیا، یو اے ای زرمبادلہ بھجوانے میں دوسرے نمبر پر ہے، جبکہ برطانیہ اور یورپین یونین زرمبادلہ بھیجوانے میں تیسرے اور چوتھے نمبر پر رہے-