سوشل میڈیا کمپنیاں پاکستان میں ورچوئل دفاتر بنائیں گی، وزارت آئی ٹی

سوشل میڈیا کمپنیوں اور وزارت آئی ٹی کے درمیان پاکستان میں ورچوئل آفس کے قیام پر اتفاق ہوگیا۔ وفاقی حکومت نے نظرثانی شدہ سوشل میڈیا رولز کو حتمی شکل دے دی۔
وزارت آئی ٹی کے حکام کے مطابق سوشل میڈیا کمپنیاں پاکستان میں دفاتر کھولنے کے بجائے ورچوئل دفاتر بنائیں گی۔ورچوئل دفاتر میں سوشل میڈیا کمپنیوں کا نمائندہ 24 گھنٹے دستیاب ہوگا۔ کمپنیاں حکومت پاکستان کی شکایت پر فوری پراسس کریں گی۔
حکومت پاکستان کی سوشل میڈیا رولز کمیٹی نے متنازعہ مواد کو تین حصوں میں تقسیم کردیا۔ ریڈ لسٹ میں شامل مواد فوری ہٹانا ہوگا۔ یلو لسٹ میں شامل مواد شکایت کے بہتر گھنٹوں میں ہٹانا لازم ہوگا۔ معمول کی شکایات کے مواد کو گرین لسٹ میں رکھا گیا ہے۔
حکام کے مطابق سوشل میڈیا کو ریگولیٹ کرنے کیلئے الگ اتھارٹی نہیں بنائی جائے گی بلکہ پی ٹی اے ہی سوشل میڈیا کو ریگولیٹ کرے گی۔ سوشل میڈیا کمیٹی نے رولز میں تجویز سزاؤں کو برقرار رکھنے کا فیصلہ کیا ہے۔