شہری اپنے ووٹ کا اندراج 23 تاریخ تک کراسکتے ہیں، الیکشن کمیشن

الیکشن کمیشن آف پاکستان نے ووٹ کے اندراج کی آخری تاریخ 23 جولائی مقرر کردی، شہری اپنے ووٹ کی معلومات قومی شناختی کارڈ نمبر 8300 پر میسیج کرکے حاصل کرسکتے ہیں۔
الیکشن کمیشن آف پاکستان (ای سی پی) نے اپنے ایک بیان میں بتایا ہے کہ شہریوں کیلئے ووٹ کے اندراج کی آخری تاریخ 23 جولائی ہے، ووٹ کی معلومات کیلئے قومی شناختی کارڈ نمبر 8300 پر میسیج کرکے حاصل کی جاسکتی ہیں۔
سیکریٹری الیکشن کمیشن عمر حمید خان نے شہریوں کو ہدایت کی ہے کہ ووٹ کے اندراج اور درستگی کیلئے ضلعی الیکشن کمیشن کے دفتر آئیں جبکہ ووٹ کے اندراج کا فارم الیکشن کمیشن کی ویب سائٹ پر بھی موجود ہے۔
انہوں نے مزید بتایا کہ فارم پُر کرکے متعلقہ ضلعی الیکشن کمیشن کے دفتر میں جمع کروائے جاسکتے ہیں۔
سیکریٹری الیکشن کمیشن نے شہریوں سے کہا ہے کہ جمہوریت کی مضبوطی کیلئے ووٹ کے اندراج کیلئے یہ آخری موقع ہے۔
واضح رہے کہ اس سے قبل بھی الیکشن کمیشن کی جانب سے ووٹ کے اندراج کی تاریخ میں کئی بار توسیع کی جاچکی ہے۔