ناموس رسالت پرکسی قسم کی مصلحت کا تصورنہیں کیا جا سکتا ، رانا ثنا اللہ

وزیر داخلہ رانا ثنا اللہ نے کہا ہے کہ ناموس رسالت پر کسی قسم کی مصلحت کا تصور نہیں کیا جا سکتا،عشق رسالت ہر مسلمان کی رگ رگ میں ہے۔
وزیر داخلہ رانا ثنا اللہ کی زیر صدارت حکومت اور تحریک لبیک پاکستان کی مشترکہ کمیٹی کا اجلاس بدھ کو یہاں منعقد ہوا۔وزیر مملکت برائے داخلہ عبدالرحمن کانجو اور سیکرٹری داخلہ سید علی مرتضیٰ جبکہ تحریک لبیک پاکستان کی جانب سے ڈاکٹر شفیق امینی، مفتی عمیر الازہری اوردیگر ممبران نے شرکت کی۔
اس کے علاوہ اجلاس میں وزارت داخلہ، وزارت خارجہ، وزارت انفارمیشن ٹیکنالوجی، ایف آئی اے، پی ٹی اے، پیمرا اور صوبائی محکمہ داخلہ کے نمائندے بھی موجود تھے۔
وفاقی وزیر داخلہ رانا ثناءاللہ خان نے کہا کہ ناموس رسالت کا تحفظ ہر مسلمان کا دینی فریضہ ہے، ناموس رسالت پر کسی قسم کی مصلحت کا تصور نہیں کیا جا سکتا،عشق رسالت ہر مسلمان کی رگ رگ میں ہے ۔ انہوں نےکہا کہ ختم نبوت پر ایمان نہ رکھنے والا مسلمان نہیں ہو سکتا۔
اجلاس میں ناموس رسالت کے تحفظ کیلئے کئے جانے والے اقدامات پر پیشرفت کا جائزہ لیا گیا۔اجلاس میں معاہدہ کے بقیہ نکات پر بھی پیشرفت کا جائزہ لیا گیا۔