استعفیٰ دے چکا،اب ن لیگ کا عہدیدار نہیں،شاہدخاقان عباسی

مسلم لیگ ن کےرہنما اور سابق وزیر اعظم شاہد خاقان عباسی نے کہا ہے کہ استعفیٰ دے چکا ہوں، اب ن لیگ کا عہدیدار نہیں ہوں، انتخابات با مقصد ہوں تو حصہ لوں گا۔
پاکستان مسلم لیگ ن کے قائد نواز شریف سے پارٹی رہنما اور سابق وزیر اعظم شاہد خاقان عباسی نے لندن میں ملاقات کی ۔حسن نواز کے دفتر میں ہونے والی ملاقات میں سیاسی صورتحال پر گفتگو کی گئی۔
ملاقات کے بعد میڈیا سے گفتگو میں شاہد خاقان عباسی نے کہا کہ نوازشریف میرے دوست اور بھائی ہیں، خدشات نہیں مشاورت کی، سیاسی تحفظات ہوتے ہیں، ذاتی تحفظات نہیں رکھے،کبھی کسی پارٹی کا عندیہ نہیں دیا، نئی پارٹی نہیں بنا رہا، استعفیٰ دے چکا ہوں، اب ن لیگ کا عہدیدار نہیں ہوں، انتخابات با مقصد ہوں تو حصہ لوں گا۔
شاہد خاقان عباسی نے کہا کہ گزشتہ دو سال میں ہرجماعت اقتدار میں رہی،لیکن ملکی حالات نہیں سدھرے، ملک کو آگے لے کر چلنے کیلئے راستے کا تعین کرنا ہے۔ملک کو آگے لے کر چلنے کیلئے ہر کسی کو ڈائیلاگ میں شامل ہونا چاہئے۔