کراچی اور حیدرآباد میں 13 سے 16 جون کے درمیان آندھی کیساتھ موسلا دھار بارش کا امکان

بحیرہ عرب کے مشرقی وسط میں موجود سمندری طوفان بپر جوائے کی شدت برقرار ہے۔
محکمہ موسمیات کے مطابق کراچی اور حیدرآباد میں 13 سے 16 جون کے درمیان آندھی کے ساتھ موسلا دھار بارش کا امکان ہے جبکہ ٹنڈو محمد خان، ٹنڈوالہ یار اور میرپور خاص میں بھی بارش ہو سکتی ہے۔
سمندری طوفان کراچی کے ساحل سے 690 کلومیٹر اور ٹھٹھہ کے ساحل سے 670 کلومیٹر دور ہے ، طوفان کے مرکز اور اطراف میں ہواؤں کی رفتار 180 سے 200 کلومیٹر فی گھنٹہ ہے ۔
محکمہ موسمیات کے مطابق سمندری طوفان کے مرکز کے اطراف سمندر میں شدید طغیانی ہے ، سمندری ہوائیں 15 جون کو ٹھٹھہ کے ساحل کیٹی بندر اور بھارتی ریاست گجرات کو عبور کریں گی ، طوفان کے دوران کیٹی بندر اور اس کے اطراف سمندری لہریں 8 سے 12 فٹ تک بلند ہو سکتی ہیں۔
محکمہ موسمیات نے ماہی گیروں کو طوفان ختم ہونے تک کھلے سمندر میں نہ جانے کی ہدایت کر دی۔