گھر بیٹھے شناختی کارڈ بنوائیں، کراچی میں بھی 'نادرا بائیکر سروس' شروع کرنے کا فیصلہ

نیشنل ڈیٹا بیس رجسٹریشن اتھارٹی( نادرا) کی جانب سے وفاقی دارالحکومت کے بعد کراچی میں بھی 'نادرا بائیکر سروس' شروع کرنے کا فیصلہ کیا گیا ہے۔
 نادرا بائیکر سروس کے ذریعے قومی شناختی کارڈز کا اجراء اور تصدیقی عمل گھر پربیٹھے بھی ممکن ہوگا۔ 
ذرائع کے مطابق اس سہولت کے تحت شہری نادرا کے عملے کو قومی شناختی کارڈز کے متفرق مراحل کیلئے گھروں پر بلواسکیں گے۔ 
ذرائع کے مطابق بائیکر سروس کے تحت سہولت کے دوران عام فیس کے مقابلے میں اضافی رقم ادا کرنا پڑے گی، بائیکر سروس کا عملہ گھر پر شناختی کارڈ کی تجدید کے دوران انگوٹھوں اور سائل کی تصاویر سمیت دیگر مراحل مکمل کرے گا۔
نئی سہولت سے شہریوں کو نادرا دفاترمیں انتظار کی زحمت سے نجات مل سکے گی۔ 
ذرائع کے مطابق کراچی میں متعارف کروائی جانے والی سہولت کیلئے خواتین بائیک رائیڈرز کی خدمات حاصل کی جائیں گی، قومی شناختی کارڈز بھی پرنٹ ہونے کے بعد شہریوں کے گھر پر نادرا بائیکر عملے کے ذریعے ڈیلیور کیے جائیں گے۔ 
واضع رہے کہ وفاقی دارالحکومت اسلام آباد میں یہ سہولت کچھ عرصہ پہلے ہی متعارف کرائی جاچکی ہے اور ضرورت مند شہری اس سے استفادہ کر رہے ہیں۔