نادرا کے 30 مرکز میں شناختی کارڈ کے ساتھ ساتھ پاسپورٹ بھی بنائے جائیں گے
اسلام آباد، لاہور اور کراچی سمیت نادرا کے 30 سے زائد مرکز میں شناختی کارڈ کے ساتھ ساتھ پاسپورٹ بھی بنائے جائیں گے۔ وزارت داخلہ نے اس سلسلے میں باضابطہ نوٹیفکیش بھی جاری کر دیا ہے وزیراعظم شہباز شریف کی ہدایت پر نیشنل ڈیٹا بیس اینڈ رجسٹریشن اتھارٹی نے عوام کے لیے نئی سہولت کا آغاز کردیا ہے۔ وزیراعظم یا وزیر داخلہ 10 جون کو اس سہولت کا باضابطہ افتتاح بھی کریں گے۔ نوٹیفکیشن کے مطابق لاہور ریجن کے 12، کراچی کے دو، ملتان کے چھ اور سرگودھا کے تین سینٹرز پر سہولت دستیاب ہو گی۔ خیبرپختونخوا میں پانچ اور اسلام آباد ریجن کے دو نادرا سینٹرز میں پاسپورٹ کانٹرز موجود ہوں گے۔ وزیراعظم نے ہدایت کی تھی کہ جس تحصیل یا سب تحصیل میں پاسپورٹ آفس نہیں وہاں نادرا دفاتر میں کانٹرز قائم کر کے عوام کو یہ سہولت فراہم کی جائے گی۔ اس کے لیے نادرا اور پاسپورٹ اینڈ ایمیگریشن نے متعدد اجلاسوں کے بعد حل یہ نکالا کہ نادرا کی لاجسٹک سپورٹ سے نادرا مراکز میں جہاں نادرا کے کانٹر ہوں گے وہیں ایک کانٹر پاسپورٹ کا ہوگا۔ جس کے لیے فرنیچر، فکسچرز، بجلی اور انٹرنیٹ نادرا فراہم کرے گا، جبکہ پاسپورٹ بنانے کے لیے عملہ پاسپورٹ اینڈ ایمیگریشن کا ہو گا۔ان مراکز میں پاسپورٹ بنوانے کے لیے آنے والوں کے لیے الگ سے ویٹنگ ایریا اور دیگر سہولیات مہیا کی جائیں گی۔
Share this:
