شناختی کارڈز کیلئے بائیو میٹرک کا نیا نظام متعارف کرادیا گیا

نادرا نے آنکھوں کے ذریعے بائیو میٹرک تصدیق کا نیا نظام متعارف کرادیا، ’’آئرس‘‘ انگلیوں اور چہرے کی شناخت کے موجودہ نظاموں کے ساتھ ہی استعمال ہوگا۔
نیشنل ڈیٹابیس اینڈ رجسٹریشن اتھارٹی (نادرا) نے قومی شناختی کارڈز کے بائیو میٹرک کا نیا نظام متعارف کرادیا۔
نادرا اب شناختی کارڈ بنوانے والوں کی انگلیوں کے نشان کے ساتھ ساتھ آنکھوں کا بھی بایو میٹرک کرے گا۔
ترجمان کا کہنا ہے کہ نادرا کا نیا نظام ’’آئرس‘‘ انگلیوں اور چہرے کی شناخت کے موجودہ نظاموں کے ساتھ ہی استعمال ہوگا، آنکھوں کے ذریعے شناخت میں غلطی کا امکان نہ ہونے کے برابر ہوگا۔
ترجمان کے مطابق آنکھ کی پتلی کے گرد بنے دائرہ نما ’’آئرس‘‘ میں پوری زندگی تبدیلی نہیں آتی، کم عمری میں کیا جانیوالا اسکین بھی عمر بھر کیلئے کسی فرد کی مستقل شناخت کے طور پر استعمال ہوسکتا ہے۔