پاکستان میں پہلی آن لائن فضائی ٹیکسی سروس کی سہولت سے عوام کب مستفید ہو سکیں گے؟
پاکستان میں جلد پہلی آن لائن فضائی ٹیکسی سروس کا آغاز ہونے والا ہے جس سے لوگ اندرون ملک کہیں بھی کم وقت میں پہنچ سکیں گے۔
اس جدید سہولت کا آغاز ایک نجی کمپنی’اسکائی وِنگز’ نے ایک غیر ملکی سرمایہ کار کے تعاون سے کراچی میں کیا ہے اور یہ سہولت اگلے دو ہفتوں میں عوام کے لیے دستیاب ہوگی۔
عوام کو اس سہولت کی فراہمی کے لیے شہر کے جناح انٹرنیشنل ایئرپورٹ نے بھی ایک معاہدے پر دستخط کردیے ہیں۔
اسکائی وِنگز ایوی ایشن کے چیف آپریٹنگ آفیسر (سی او او) عمران اسلم خان نے جیو نیوز کو بتایا کہ عوام اس آن لائن ایئر ٹیکسی سروس کو حاصل کرنے کے لیے کسی بھی دوسری ٹیکسی بکنگ سروس کی طرح موبائل ایپ کے ذریعے اپنے مطلوبہ وقت اور منزل کا انتخاب کرسکتے ہیں۔
اُنہوں نے بتایا کہ اس سروس کا کرایہ عام چارٹر پروازوں سے بہت کم ہوگا جس پر کراچی سے سندھ اور بلوچستان کے مختلف شہروں کے سفر کے لیے 25 لاکھ روپے خرچ ہوتے ہیں۔
