یوٹیوب نے اشتہارات سے متعلق نئی پالیسی جاری کردی
دنیا کی معروف ترین ویڈیوشیئرنگ ویب سائٹ یوٹیوب نے اشتہارات سے متعلق نئی پالیسی جاری کر دی،جس سے ٹی وی پریوٹیوب استعمال کرنے والوں کو مشکل کا سامنا ہوگا ، کیونکہ یوٹیوب کی جانب سے ٹی وی پر دیکھے جانے والے مواد میں 30 سیکنڈ کے ایسے اشتہارات کا اضافہ کیا جارہا ہے ،جن کو آگے نہیں بڑھایا جاسکے گا۔
غیر ملکی میڈیا رپورٹس کے مطابق یوٹیوب کی جانب سے کہا گیا ہے کہ ناظرین دو لگاتار 15 سیکنڈ کے اشتہارات کے بجائے ایک 30 سیکنڈ کا اشتہار دیکھیں گے۔ لیکن اس کا مطلب یہ نہیں کہ قلیل مدتی اشتہارات مستقل طور پرختم کر دیے جائیں گے۔
رپورٹس کے مطابق یوٹیوب نے کہا ہے کہ 30 سیکنڈ کے اشتہار، اشتہار دِکھانے والوں کو یوٹیوب سلیکٹ پلیٹ فارم کے ذریعے دستیاب ہوں گے، یہ ایک ایسا پلیٹ فارم ہے جو یوٹیوب کے صفِ اول کے پانچ فیصد مواد کو ہدف بناتا ہے۔یوٹیوب کا دعویٰ ہے کہ یوٹیوب سلیکٹ کے 70 فی صد امپریشن ٹی وی سے آتے ہیں جو طویل اشتہارات کے لیے اس کو مثالی پلیٹ فارم بناتے ہیں۔
میڈیارپورٹس کے مطابق یوٹیوب کے سی ای او نِیل موہن نے برانڈ کاسٹ تقریب کے دوران کہا کہ اپنے گھروں میں بڑی اسکرین پر یوٹیوب دیکھنے والوں کی تعداد بڑھتی جا رہی ہے۔
