دہشتگرد تنظیموں کی طرح فوجی املاک کو نقصان پہنچایا گیا، چودھری سرور

پاکستان مسلم لیگ ق کے چیف آرگنائزرچودھری سرور نے کہا ہے کہ دہشت گرد تنظیموں کی طرح فوجی املاک کو نقصان پہنچایا گیا۔
مسلم لیگ ق کے چیف آرگنائزرچوہدری سروراور جنرل سیکرٹری پنجاب شافع حسین سے لاہور، اوکاڑہ، خانیوال اور تلہ گنگ کے وفود نے ملاقات کی، جس میں افواج پاکستان سے اظہار یک جہتی کے لیئے ریلی نکالنے سے متعلق انتظامات پر تبادلہ خیال کیا گیا۔
اس موقع پر چودھری سرور نے کہا کہ جس طرح افواج پاکستان کی املاک کو نقصان پہنچایا گیا اس طرح صرف دہشتگرد تنظیمیں کرتی ہیں،شر پسندوں نے طالبان اور بی ایل اے کے دہشت گردوں جیسی کارروائیاں کی، شر پسند عناصر کی جانب سےاملاک کو نقصان پہنچانا کسی صورت قابل قبول نہیں۔
چودھری شافع حسین نے کہا کہ افواج پاکستان سے اظہار یک جہتی کے لئے بھرپور ریلی نکال رہے ہیں،جس میں محب وطن پاکستانیوں اور پی ایم ایل کے ورکر کثیر تعداد میں شریک ہوںگے۔
خیال رہے کہ القادر ٹرسٹ کیس میں رینجرز کی معاونت سے نیب کے ہاتھوں تحریک انصاف کے چیئرمین عمران خان کی گرفتاری کے بعد9 مئی کو پی ٹی آئی کارکنوں کی جانب سے ملک بھر میں پرتشدد مظاہرے کیے گئے، اس دوران پی ٹی آئی کے بلوائیوں نے سول اور عسکری تنصیبات میں گھس کر توڑ پھوڑکی۔
تحریک انصاف کے بلوائیوں کی جانب سے سول و عسکری املاک کو نقصان پہنچانے کیخلاف اور پاک فوج سے اظہار یکجہتی کیلئے ملک میں ریلیاں نکالی جارہی ہیں۔