بجٹ خسارہ 3534 ارب روپے تک پہنچ گیا، مالی سال کے 9 ماہ کی رپورٹ جاری

موجودہ مالی سال کے پہلے 9 ماہ کے دوران آمدن اور اخراجات کی رپورٹ جاری کردی گئی۔ وزارت خزانہ کے مطابق وفاقی حکومت کا بجٹ خسارہ 3 ہزار 534 ارب روپے تک پہنچ گیا، دفاعی اخراجات ایک ہزار ارب روپے سے تجاوز کر گئے۔

وزارت خزانہ نے مالی سال 23-2022ء کے ابتدائی 9 ماہ کی آمدن و اخراجات کی رپورٹ جاری کردی۔ جس میں بتایا گیا ہے کہ وفاقی حکومت کا بجٹ خسارہ 3 ہزار 534 ارب روپے تک پہنچ گیا، اس دوران 3 ہزار 443 ارب آمدن کے مقابلے میں مجموعی اخراجات 6 ہزار 978 ارب روپے سے تجاوز گئے۔

رپورٹ کے مطابق جولائی 2022ء سے مارچ 2023ء تک قرضوں اور سود کی ادائیگی پر 3 ہزار 582 ارب خرچ ہوئے، گزشتہ سال کے مقابلے سود کی ادائیگی پر 1464 ارب روپے زیادہ اخراجات کئے گئے۔

رپورٹ میں بتایا گیا ہے کہ رواں مالی سال کے ابتدائی 9 ماہ میں دفاعی اخراجات ایک ہزار ارب روپے سے تجاوز کر گئے، ترقیاتی منصوبوں پر 428 ارب خرچ ہوئے، سبسڈیز پر 524 ارب اور پنشن کی ادائیگی پر 486 ارب سے زائد اخراجات آئے،

وزارت خزانہ کے مطابق جولائی تا مارچ ایف بی آر نے 5 ہزار 156 ارب روپے ٹیکس وصول کیا، نان ٹیکس ریونیو ایک ہزار 240 ارب روپے رہا، 9 ماہ میں صوبوں کا بجٹ 456 ارب روپے سرپلس رہا۔