نیوزی لینڈ کو شکست دیکر پاکستان ون ڈے کی نمبر ون ٹیم بن گئی

ون ڈے سیریز کے چوتھے میچ میں پاکستان نے نیوزی لینڈ کو ہرا دیا، قومی ٹیم کے کپتان شاندار سنچری بنانے پر مرد میدان قرار پائے۔ اس طرح گرین شرٹس انٹرنیشنل کرکٹ کونسل (آئی سی سی) کی رینکنگ میں پہلے نمبر پر آ گئی۔ رینکنگ میں پہلے نمبر پر رہنے کے لیے آخری میچ میں جیت ضروری ہے۔
پاکستان اور نیوزی لینڈ کے درمیان ہونےوالے پانچ میچز کی سیریز کے چوتھے ون ڈے میچ میں مہمان ٹیم کے کپتان ٹام لیتھم نے ٹاس جیت کر میزبان ٹیم کے کپتان بابر اعظم کو بیٹنگ کی دعوت دی۔
نیوزی لینڈ کی بیٹنگ
ہدف کے تعاقب میں کیویز کی طرف سے اننگ کا آغاز ول ینگ اور ٹام بلنڈل نے کیا، دونوں نے محتاط انداز میں بیٹنگ کا آغاز کیا تاہم 8 ویں اوورز میں 36 کے مجموعی سکور پر ول ینگ چلتے بنے، انہوں نے 20 گیندوں پر 15 سکور بنائے۔
46 کے مجموعی سکور پر ٹام بلنڈل بھی پویلین لوٹ گئے، انہوں نے 29 گیندوں پر 23 سکور بنائے۔
اسی دوران ڈیرل مچل اور ٹام لیتھم نے 103 گیندوں پر 83 رنز کی پارٹنر شپ بنائی۔ جس کا خاتمہ شاہین شاہ آفریدی نے کیا، ڈیرل مچل کی باری 34 سکور پر ختم ہوئی، ٹام لیتھم 60 رنز کر چلتے بنے۔
اس کے بعد کوئی بھی بیٹرز قابل ذکر کارکردگی نہ دکھا سکے اور وقتا فوقتاً چلتے بنے، مارک چیمپن 46، جیمی نیشم 11، میک کونچی 8، ایش سوڈھی 9 ، میٹ ہینری 5 اور بلیئر ٹکنر 6 رنز بنا کر پویلین لوٹ گئے۔
نیوزی لینڈ کی ٹیم 232 رنز پر ڈھیر ہو گئی، اس طرح قومی ٹیم نے یہ میچ 102 رنز سے جیتا، قومی ٹیم کی طرف سے اُسامہ میر نے 4، محمد وسیم نے 3 شکار کیے، حارث رؤف کے حصے میں دو جبکہ شاہین شاہ کے حصے میں ایک وکٹ حاصل آئی۔
پاکستانی بیٹنگ
اس سے قبل قومی ٹیم کی طرف سے اننگ کا آغاز فخر زمان اور شان مسعود نے کیا، دونوں نے محتاط انداز میں بیٹنگ کا آغاز کیا، سیریز کے پہلے دو ون ڈے میچوں میں مسلسل دو سنچریاں بنانے والے فخر زمان اس بار میں بڑی اننگز کھیلنے میں ناکام رہے اور 7 ویں اوورز میں 36 کے مجموعی سکور پر 17 گیندوں پر 14 رنز بنا کر میٹ ہینری کا شکار بن گئے۔
شان مسعود اور بابر اعظم سکور کو آگے لیکر چلے ، اس دوران دونوں بیٹرز نے زبردست چوکے لگائے، تاہم شان مسعود بدقسمت ثابت ہوئے اور ففٹی مکمل نہ کر سکے، 86 کے مجموعی سکور پر 55 گیندوں پر 44 رنز بنا کر سوڈھی کی گیند پر اسٹیمپ آؤٹ ہو گئے۔
محمد رضوان اس بار بڑی اننگز کھیلنے میں ناکام رہے اور 28 گیندوں پر 24 رنز بنا کر رن آؤٹ ہو گئے۔
اس دوران بابراعظم نے اپنے کیریئر کی 27 ویں نصف سنچری بنائی۔ کپتان کی اپنے کیریئر کے آخری 16 میچز میں 13 ویں نصف سنچری تھی۔
قومی ٹیم کے کپتان نے مڈل آرڈر بیٹر آغا سلمان کے ساتھ مل کر سکور کو تیزی سے آگے بڑھایا، دونوں کے درمیان 100 گیندوں پر 117 رنز کی زبردست پارٹنر شپ بنی۔
اس پارٹنر شپ کا اختتام میٹ ہینری نے کیا جنہوں نے آغا سلمان کو 58 سکور پر پویلین بھیج دیا، افتخار احمد نے کپتان کے ساتھ مل کر جارحانہ باری کھیلی، مڈل آرڈر بیٹر 22 گیندوں پر 28 سکور بنا کر چلتے بنے۔
اس دوران قومی ٹیم کےکپتان بابر اعظم نے اپنے کیریئر 18 ویں سنچری مکمل کی، کپتان نے 117 گیندوں پر 107 رنز کی باری کھیلی، وہ لسٹر کی گیند پر میک کونچی کو کیچ دے بیٹھے۔
نمبر ون بیٹر نے ون ڈے انٹرنیشنل کرکٹ میں ایک اور سنگ میل عبور کرتے ہوئے سب سے کم اننگز میں 18 سنچریوں کا ورلڈ ریکارڈ بھی اپنے نام کر لیا۔ اس سے قبل ہاشم آملہ نے یہ کارنامہ 102، ڈیوڈ وارنر نے 115 جبکہ کوہلی نے 119 اننگز میں انجام دیا تھا۔
آخری اوورز میں میچ دلچسپ ہوا ، قومی ٹیم کے فاسٹ باؤلر شاہین شاہ آفریدی نے 7 گیندوں پر 23 سکور کی باری کھیلی، آخری دو اوورز میں گرین شرٹس نے 38 رنز بنائے۔
پاکستان نے مقررہ اوورز میں 6 وکٹوں کے نقصان پر 334 رنز بنائے، میٹ ہینری نے تین، بین لسٹر، ایش سوڈھی نے ایک ایک وکٹ حاصل کی۔
پاکستان نمبر ون ٹیم بن گئی
نیوزی لینڈ کو سیریز کے چوتھے میچ میں شکست دینے کے بعد قومی ٹیم انٹرنیشنل کرکٹ کونسل (آئی سی سی) پر نمبر ون ٹیم بن گئی ہے جبکہ نمبر ون ٹیم برقرار رکھنے کے لیے بابر اعظم الیون کو اگلا میچ بھی جیتنا ہو گا۔
اگر رینکنگ کا تقابلی جائزہ لیا جائے گرین شرٹس 113.482پوائنٹس لیکر نمبر ون ٹیم ہے جبکہ دوسرے نمبر پر آسٹریلوی ٹیم ہے جس کے 113.28 پوائنٹس ہیں، بھارتی ٹیم 112.638 پوائنٹس کے ساتھ تیسرے نمبر پر ہے۔
اگر قومی ٹیم آخری میچ میں کیویز سے شکست کھا جاتی ہے تو رینکنگ میں تیسرے نمبر پر آ جائے گی، پہلے نمبر پر کینگروز کا قبضہ برقرار رہے گی۔
پاکستانی سکواڈ
سیریز کے چوتھے میں پاکستان کی ٹیم میں 5 تبدیلیاں کی گئیں، امام الحق، شاداب خان، عبد اللہ شفیق ، محمد نواز ، نسیم شاہ کی جگہ شان مسعود، افتخار احمد، محمد حارث، اُسامہ میر، حارث رؤف کو شامل کیا گیا۔
فخر زمان، شان مسعود، بابر اعظم، محمد رضوان، آغا سلمان، افتخار احمد، محمد حارث، اُسامہ میر، شاہین شاہ آفریدی، محمد وسیم، حارث رؤف
نیوزی لینڈ سکواڈ
ول ینگ، ٹام بلنڈل، ڈیرل مچل، ٹام لیتھم، مارک چیمپن، جیمی نیشم، کول میکونچی، ایش سوڈھی، میٹ ہینری، بین لسٹر، بلیئر ٹکنر