بلاول بھٹو کی روسی ہم منصب سے ملاقات، بھارتی وزیر خارجہ سے مصافحہ

 وفاقی وزیر خارجہ بلاول بھٹو زرداری نے روسی ہم منصب سرگئی لاوروف سے شنگھائی تعاون تنظیم کی وزرائے خارجہ کونسل کے بھارت کے شہر گوا میں ہونے والے اجلاس کے موقع پر ملاقات کی۔**
ملاقات کے دوران انہوں نے باہمی دلچسپی کے دوطرفہ، علاقائی اور بین الاقوامی امور پر تبادلہ خیال کیا۔
وزیر خارجہ بلاول نے فوڈ سکیورٹی، توانائی اور عوام کے درمیان رابطوں میں تعاون کو مزید گہرا کرنے کے لیے مل کر کام کرنے کی یقین دہانی کرائی۔
انہوں نے کہا کہ ایس سی او نے روس کے ساتھ تعاون اور ہم آہنگی کے نئے راستے کھولے ہیں۔
دوسری طرف وزیر خارجہ بلاول بھٹو زرداری کا بھارتی ہم منصب جے شنکر کے ساتھ شنگھائی تعاون تنظیم کے دوران مصافحہ ہوا۔ یہ مصافحہ وزرائے خارجہ کے اعزاز میں عشائیہ کے دوران ہوا۔
خیال رہے کہ بلاول بھٹو زرداری شنگھائی تعاون تنظیم (ایس سی او) کے وزرائے خارجہ اجلاس میں شرکت کے لیے بھارت کے شہر گووا پہنچ گئے۔
واضح رہے کہ 2011 کے بعد بھارت کا دورہ کرنے والے پہلے وزیر خارجہ نے توقع ظاہر کی ہے کہ شنگھائی تعاون تنظیم (ایس سی او) کے وزرائے خارجہ کی کونسل کا اجلاس کامیاب رہے گا، شنگھائی تعاون تنظیم کے اجلاس میں شرکت اور پاکستانی وفد کی قیادت کرنا میرے لیے خوشی کا باعث ہے۔
اپنی روانگی سے قبل بیان میں بلاول بھٹو زرداری نے کہا کہ وہ شنگھائی تعاون تنظیم میں شامل ممالک کے ساتھ باہمی روابط کے منتظر ہیں۔ گووا میں پاکستانی وفد کی قیادت کروں گا، اجلاس میں میری شرکت کا فیصلہ یہ واضح کرتا ہے کہ پاکستان ایس سی او اور اس کی رکنیت کو کتنی اہمیت دیتا ہے۔