190 ملین پاؤنڈ کرپشن کیس: عمران کے جسمانی ریمانڈ کی استدعا مسترد

اسلام آباد کی احتساب عدالت نے 190 ملین پاؤنڈ کرپشن کیس میں چیئرمین پی ٹی آئی عمران خان کے جسمانی ریمانڈ کی استدعا مسترد کر دی۔
احتساب عدالت کے جج محمد بشیر نے اڈیالہ جیل میں سماعت کی، اس موقع پر نیب پراسیکیوٹر مظفر عباسی نے 10 روز کے جسمانی ریمانڈ کی استدعا کی جبکہ عمران خان کے وکیل سلمان صفدر نے جسمانی ریمانڈ کی مخالفت کی۔
احتساب عدالت کے جج نے نیب پراسیکیوٹر اور عمران خان کے وکیل کے دلائل سننے کے بعد فیصلہ محفوظ کیا تھا جو سنا دیا گیا۔
اب نیب کی ٹیم اڈیالہ جیل میں چیئرمین پی ٹی آئی عمران خان سے تفتیش کرے گی۔
واضح رہے کہ گزشتہ روز اسلام آباد کی احتساب عدالت نے 190 ملین پاؤنڈ کرپشن کیس میں عمران خان کے وارنٹ گرفتاری جاری کیے تھے جس کے بعد جیل میں ہی ان کی گرفتاری عمل میں لائی گئی۔
عمران خان اس سے قبل سائفر کیس میں جیل میں قید ہیں اور سیکیورٹی وجوہات کی بنا پر ان کا ٹرائل جیل میں ہی کیا جا رہا ہے، آج وزارت قانون نے 190 ملین پاؤنڈ کرپشن کیس میں بھی عمران خان کے جیل ٹرائل کا نوٹیفکیشن جاری کیا ہے۔