برطانوی شاہ چارلس کی تاج پوشی کی تقریب کی تیاریاں، لندن سیاحوں سے بھر گیا

برطانوی شاہ چارلس کی تاج پوشی کی تقریب 6 مئی بروز  ہفتے کے روز ویسٹ منسٹر ایبی میں ہوگی۔
شاہ چارلس کی  تاج پوشی سے پہلے ہی لندن سیاحوں سے بھر گیا، تاج پوشی کی تقریب کی وجہ سے ویک اینڈ پر سینٹرل لندن کی متعدد سڑکیں بند ہوں گی ۔
رپورٹس کے مطابق ہفتے کی صبح 6 بجے سے پارلیمنٹ اسکوائر،وائٹ ہال اور مال کا علاقہ عوام کیلئے کھول  دیا جائے گا۔
شاہ چارلس صبح 11 بجے بکنگھم پیلس سے ویسٹ منسٹرایبی روانہ ہوں گے ، تاج پوشی کے بعد بکنگھم پیلس کی بالکونی پر کھڑے ہونے پر شاہ چارلس کو طیارے فلائی پاسٹ پیش کریں گے ۔
رپورٹس کے مطابق تاج پوشی کی تقریب میں 2 ہزار افراد کو مدعو کیا گیا ہے، پاکستان کی نمائندگی وزیراعظم شہبازشریف کریں گے۔
واضح رہے کہ ملکہ الزبتھ دوم کی وفات کے بعد شاہ چارلس سوم برطانیہ کے بادشاہ بنے ہیں۔

اسکاٹش حکومت کے نومنتخب سربراہ کی سرکاری رہائش گاہ میں نماز کی ادائیگی

لندن(نیوز ڈیسک) اسکاٹش حکومت کے نومنتخب سربراہ پاکستانی نژاد حمزہ یوسف کی سرکاری رہائش گاہ میں نماز ادائیگی کی تصاویر وائرل ہوگئی۔ غیرملکی خبررساں ادارے ’اے ایف پی‘ کے مطابق 27 مارچ کو اسکاٹ لینڈ کی پارلیمنٹ نے حمزہ یوسف کو نکولا اسٹرجن کی جگہ فرسٹ منسٹر قرار دیا جو ملک کے سب سے کم عمر اور مغربی یورپ میں کسی حکومت کے پہلے مسلم رہنما ہیں۔بادشاہ کی جانب سے باضابطہ منظوری کے بعد 28 مارچ کو اپنے عہدے کا حلف اٹھایا۔ خیال رہے کہ حمزہ یوسف گلوسگو میں پولک سے رکن اسکاٹش پارلیمنٹ ہیں اور اب وہ اسکاٹس لینڈ کے نئے فرسٹ منسٹر یعنی اسکاٹش حکومت کے سربراہ ہوں گے۔ اس حوالے سے بتایا گیا کہ 37 سالہ حمزہ یوسف نئے منصب پر فائز ہونے کے بعد برطانوی سیاسی جماعت کے پہلے مسلمان اور پاکستانی نژاد لیڈر بن گئے ہیں۔اس سے قبل وہ وزیر صحت کی حیثیت سے فرائض انجام دے چکے ہیں۔ وہ محض 26 برس کی عمر میں اسکاٹش پارلیمنٹ کا رکن بنے اور انہیں پارلیمنٹ کا کم عمر ترین رکن کا اعزاز بھی حاصل ہے۔پاکستانی نژاد حمزہ یوسف اسکاٹش کابینہ میں وزیر انصاف اور ٹرانسپورٹ بھی رہ چکے ہیں۔

برطانیہ کی سیاست میں نئی تاریخ رقم ‘پاکستانی نژاد حمزہ یوسف سکاٹش حکومت کے سربراہ منتخب

برطانیہ (نیوز ڈیسک )پاکستانی نژاد حمزہ یوسف  برطانوی سیاست میں نئی تاریخ رقم کرتے ہوئے برطانیہ کی ایک بڑی سیاسی جماعت، اسکاٹش نیشنل پارٹی (ایس این پی) کے سربراہ منتخب ہوگئے۔ وہ پہلے پاکستانی نژاد اور مسلمان ہیں جنہیں یہ اعزاز حاصل ہوا۔بی بی سی کے مطابق حمزہ یوسف اسکاٹش نیشنل پارٹی سربراہ منتخب ہوگئے اور وہ نکولا اسٹرجن کی جگہ لیں گے۔ اس طرح وہ پہلے پاکستانی نژاد اور مسلمان ہیں جو اسکاٹ لینڈ کے نئے فرسٹ منسٹر یعنی اسکاٹش حکومت کے سربراہ ہوں گے۔حمزہ یوسف نے نئی قیادت کے مقابلے کی دوڑ میں اپنے حریفوں کیٹ فوربس اور ایش ریگن کو شکست دی ہے اور انہوں نے کاسٹ کیے گئے کل ووٹوں میں سے 52 فیصد ووٹ حاصل کیے ہیں۔مقابلہ جیتنے کے بعد حمزہ یوسف نے اپنی تقریر میں کہا کہ انہیں جو اہم ذمہ داری ملی ہے اس کے لیے وہ دن کے ہر لمحہ کام کریں گے اور سب کے اعتماد پر پورا اتریں گے۔ان کا مزید کہنا تھا کہ پہلے وزیر کے طور پر اپنے ملک کی خدمت کرنا ان کی زندگی کا سب سے بڑا اعزاز ہے۔ سینتیس سالہ حمزہ یوسف برطانیہ کی کسی بڑی پارٹی کی قیادت کرنے والے پہلے مسلمان ہیں اور انہوں نے اس سے پہلے پارلیمنٹ کے رکن کی حیثیت سے خدمات انجام دی ہیں۔حمزہ یوسف کا خاندان پاکستان سے ہجرت کرکے اسکاٹ لینڈ کے شہر گلاسگو مقیم ہوا تھا۔ حمزہ سنہ 1985 میں پیدا ہوئے اور انہوں نے گلاسگو یونیورسٹی میں سیاسیات کی تعلیم حاصل کی۔